ნიუ-იორკის გენერალური პროკურორი ლეტიცია ჯეიმსი სასამართლოში უჩივის კომპანია Valve-ს იმ ბრალდებით, რომ პლატფორმა უკანონოდ უწყობს ხელს აზარტულ თამაშებს ბავშვებში. ეს ინფორმაცია დღეს გენერალური პროკურატურის მიერ გავრცელებულ პრესრელიზშია ნათქვამი. რელიზის მიხედვით, ჩატარებული გამოძიების შედეგად, პროკურატურამ „აღმოაჩინა, რომ Valve-ის ვიდეო თამაშები, მათ შორის Counter-Strike 2, Team Fortress 2 და Dota 2, მომხმარებლებს უბიძგებს გადაიხადონ თანხა მნიშვნელოვანი ფულადი ღირებულების მქონე იშვიათი ვირტუალური ნივთის მოგების შანსისთვის და ამით ხელს უწყობს აზარტულ თამაშებს.“ Valve-ის ყველაზე პოპულარულ თამაშში [Counter-Strike 2] ეს პროცესი სათამაშო ავტომატს ჰგავს – ანიმირებული მბრუნავი ბორბლით, რომელიც საბოლოოდ არჩეულ ნივთზე ჩერდება. შემთხვევით შერჩეულ ვირტუალურ ნივთებს არ გააჩნია თამაშშიდა ფუნქციონალი, მაგრამ მათი ონლაინ გაყიდვა შესაძლებელია რეალურ ფულზე. გავრცელებული ინფორმაციით, ერთი ასეთი ნივთი მილიონ დოლარზე მეტად გაიყიდა. სარჩელში ნათქვამია, რომ Valve-მა მილიარდობით დოლარი გამოიმუშავა თავისი მომხმარებლების, რომელთაგან ბევრი მოზარდია ან უფრო მცირე ასაკის, აზარტულ თამაშებში ჩართვით – ძვირადღირებული ვირტუალური ნივთების მოგების იმედით, რომელთა განაღდებაც შემდგომში შეუძლიათ. ამ სარჩელით, გენერალური პროკურორი ჯეიმსი ცდილობს სამუდამოდ შეაჩეროს Valve-ის მიერ თამაშებში უკანონო აზარტული თამაშების ხელშეწყობა და მოითხოვს უკანონოდ მიღებული მოგების დაბრუნებასა და ჯარიმების დაკისრებას. თავად სარჩელი აღწერს როგორც „ლუთ-ბოქსების“ მუშაობის მექანიზმს სამივე თამაშში, ასევე იმ გზებს, რომლითაც მომხმარებლებს შეუძლიათ ვირტუალური ნივთების „განაღდება“ – მათი Steam Community Market-ზე გაყიდვით, ან მათი ანგარიშების მესამე მხარის სავაჭრო პლატფორმებთან დაკავშირებით. გენერალური პროკურატურის განცხადებით, მათ აღმოაჩინეს, რომ Valve „ხელს უწყობს და ეხმარება კიდეც“ ამ უკანასკნელ პრაქტიკას. გენერალური პროკურატურა ამტკიცებს, რომ Valve-ის „ლუთ-ბოქსების“ მოდელი არის „კლასიკური აზარტული თამაში, აკრძალული ნიუ-იორკის კონსტიტუციითა და სისხლის სამართლის კოდექსით.“ აზარტული თამაშები ნიუ-იორკში უკანონოა, მცირე გამონაკლისების გარდა, რომლებიც, გენერალური პროკურორის თქმით, ამ შემთხვევაში არააქტუალურია. კითხვა იმის შესახებ, უნდა დარეგულირდეს თუ არა „ლუთ-ბოქსები“ როგორც აზარტული თამაშები, ათწლეულზე მეტია აქტუალურია. ამ წლების განმავლობაში სხვადასხვა ქვეყნებმა მათთან დაკავშირებით არაერთი რეგულაცია გამოსცეს. ჩინეთი, სამხრეთ კორეა და ზოგიერთი სხვა ქვეყანა ავალდებულებს კომპანიებს, ძალიან კონკრეტული მეთოდებით გაამჟღავნონ გარკვეული ნივთების მიღების შანსები. ავსტრალიაში, „ლუთ-ბოქსების“ არსებობა ავტომატურად ანიჭებს თამაშს M რეიტინგს (არ არის რეკომენდებული 15 წლამდე ბავშვებისთვის, თუმცა კანონით არ არის შეზღუდული), ხოლო ნებისმიერი თამაში სიმულირებული აზარტული თამაშებით იღებს R18+ რეიტინგს, რაც ნიშნავს, რომ მისი გაყიდვა არასრულწლოვნებისთვის აკრძალულია. ბელგიამ სცადა მათი სრულად აკრძალვა, თუმცა, როგორც ჩანს, ამის აღსრულება უჭირს. ნიუ-იორკის სარჩელის მიზანია Valve-სთვის თამაშებში აზარტული თამაშების ფუნქციების ხელშეწყობის სამუდამოდ შეწყვეტა, მომხმარებლებისთვის სრული კომპენსაციის გადახდა, ამ პრაქტიკიდან მიღებული მთელი მოგების დათმობა და ნიუ-იორკის კანონების დარღვევისთვის ჯარიმების გადახდა. წარმატების შემთხვევაში, ამ საქმეს შესაძლოა მნიშვნელოვანი ტალღოვანი ეფექტი მოჰყვეს ინდუსტრიის დანარჩენ ნაწილზე, რადგან კომპანიები იძულებული იქნებიან, სხვადასხვა რეგიონში „ლუთ-ბოქსების“ შესახებ არსებულ მზარდ კანონთა მთელ რიგს დაემორჩილონ. „უკანონო აზარტული თამაშები შეიძლება საზიანო იყოს და სერიოზული დამოკიდებულების პრობლემები გამოიწვიოს, განსაკუთრებით ჩვენი ახალგაზრდებისთვის,“ – განაცხადა გენერალურმა პროკურორმა ჯეიმსმა განცხადებაში. „Valve-მა მილიარდობით დოლარი გამოიმუშავა იმით, რომ ბავშვებსაც და უფროსებსაც უკანონოდ აძლევდა შესაძლებლობას ეთამაშათ აზარტული თამაშები ღირებული ვირტუალური პრიზების მოგების მიზნით. ეს ფუნქციები დამოკიდებულებას იწვევს, საზიანო და უკანონოა, და ჩემი ოფისი სარჩელს შეაქვს Valve-ის უკანონო ქმედებების შესაჩერებლად და ნიუ-იორკელების დასაცავად.“ IGN-მა Valve-ს კომენტარისთვის მიმართა.