„ნეონ გენეზის ევანგელიონის“ ახალი სერიალი დაანონსდა, რომელზეც იოკო ტარო იმუშავებს

საკულტო ანიმე „ნეონ გენეზის ევანგელიონი“ სრულიად ახალ სერიალს მიიღებს, რომლის კომპოზიციასა და სცენარზე Nier-ის რეჟისორი იოკო ტარო იმუშავებს. სერიალის თანაპროდიუსერია „ევანგელიონის“ ორიგინალი შემქმნელის, ჰიდეაკი ანოს „სტუდია ხარა“. ეს სიახლე დღეს, „ევანგელიონი:30+“ – „ევანგელიონის“ 30 წლის იუბილესადმი მიძღვნილი ღონისძიების დასასრულს გამოცხადდა. ეს იყო სამდღიანი ფესტივალი, რომელიც იაპონიის ქალაქ იოკოჰამაში გაიმართა ფრენჩაიზის სამი ათწლეულის აღსანიშნავად. ფესტივალზე წარმოდგენილი იყო გამოფენები, თოქ-შოუები, „ევანგელიონის“ კაბუკის ადაპტაცია და სრულიად ახალი 15-წუთიანი მოკლემეტრაჟიანი ფილმი ასუკა ლენგლის მონაწილეობით. ეს ღონისძიება გასული წლის განმავლობაში ჩატარებული სხვადასხვა საიუბილეო პროექტის კულმინაცია იყო. იოკო ტაროს „ნეონ გენეზის ევანგელიონის“ ახალ სერიალზე ორი რეჟისორი შეუერთდება: კაზუია ცურუმაკი (რომელიც ადრე „ევანგელიონის აღდგენის“ (Rebuild of Evangelion) ფილმებს ხელმძღვანელობდა) და ტოკო იატაბე (რომელიც „აღდგენის“ პროექტის ერთ-ერთი მთავარი ანიმატორი იყო). მუსიკას ნიჭიერი კომპოზიტორი კეიჩი ოკაბე დაწერს, რომელსაც ნამუშევარი აქვს Nier, Drakengard და Tekken თამაშებზე. ახალი სერიალის პროდიუსერები იქნებიან ორიგინალური სერიალის რეჟისორ ჰიდეაკი ანოს „სტუდია ხარა“ და CloverWorks. მიუხედავად იმისა, რომ სიუჟეტის დეტალები ჯერ არ გამოვლენილა, ოფიციალური განცხადება ხაზს უსვამს, რომ ეს იქნება სრულიად ახალი სერიალი. X-ზე, იოკო ტარომ „სტუდია ხარას“ პოსტი გააზიარა და კომენტარი გააკეთა: „დაანონსდა! ყველაფერს გავაკეთებ!“ ორიგინალი ანიმე ტელესერიალი „ნეონ გენეზის ევანგელიონი“ 1995-დან 1996 წლამდე გადიოდა და დიდი ჰიტი გახდა არა მხოლოდ იაპონიაში, არამედ მის ფარგლებს გარეთაც. 1997 წლის ფილმმა „ევანგელიონის დასასრული“ (The End of Evangelion) სერიალის ალტერნატიული დასასრული შემოგვთავაზა. 2007-დან 2021 წლამდე გამოვიდა ოთხი ფილმისგან შემდგარი სერია „ევანგელიონის აღდგენა“ (Rebuild of Evangelion). ორიგინალური ტელესერიალის ეს ახალი გადმოცემა ძალზე პოპულარული იყო, ბოლო ფილმმა „ევანგელიონი: 3.0+1.0 სამჯერ ერთხელ“ (Evangelion: 3.0+1.0 Thrice Upon a Time) იაპონიის კინოგაქირავებაში 10 მილიარდ იენს გადააჭარბა. „სტუდია გაინაქსი“ (Studio Gainax), ორიგინალური ანიმეს შემქმნელი სტუდია, გასული წლის დეკემბერში ლიკვიდირებულ იქნა სკანდალების სერიის, ასევე „სტუდია ხარასთან“ სამართლებრივი ბრძოლების შემდეგ – რასაც ანომ „ნამდვილად იმედგამაცრუებელი დასასრული“ უწოდა. ვერიტი თაუნსენდი არის იაპონიაში მოღვაწე თავისუფალი მწერალი, რომელიც ადრე მუშაობდა რედაქტორად, კონტრიბუტორად და მთარგმნელად თამაშების საინფორმაციო საიტ Automaton West-ისთვის. მას ასევე აქვს დაწერილი სტატიები იაპონურ კულტურასა და ფილმებზე სხვადასხვა გამოცემისთვის.