ლას-ვეგასში, ინტერაქტიული ხელოვნებისა და მეცნიერების აკადემიის D.I.C.E. Awards-ის ცერემონიაზე, "Clair Obscur: Expedition 33"-მა 23 კატეგორიიდან ხუთი ჯილდო, მათ შორის „წლის თამაში“, მოიპოვა. Sandfall Interactive-ის თამაში, 2025 წლის აპრილში გამოშვების შემდეგ, კრიტიკოსების მოწონებასა და დაჯილდოების ცერემონიებზე გამორჩეული ყურადღებით სარგებლობს. მისი დეველოპერების გუნდს კი, შემოქმედებისთვის აღიარების ნიშნად, საფრანგეთის ხელოვნებისა და ლიტერატურის ორდენის რაინდის სტატუსი მიენიჭა. დაჯილდოებაზე ასევე აღინიშნა სხვა თამაშები: "Ghost of Yotei"-მ სამი ჯილდო მოიპოვა, მათ შორის „გამორჩეული მიღწევა პერსონაჟის შექმნაში“, ხოლო "Arc Raiders"-მა „წლის ონლაინ თამაშის“ ტიტული დაისაკუთრა. Naughty Dog-ის ყოფილი პრეზიდენტი და თანადამფუძნებელი, ევან უელსი, AIAS-ის დიდების დარბაზში შეიყვანეს. „წლევანდელ D.I.C.E. Awards-ზე აღიარებული თამაშები ასახავს ნიჭისა და კრეატიულობის არაჩვეულებრივ სპექტრს, რაც ჩვენს ინდუსტრიას განსაზღვრავს,“ — განაცხადა ინტერაქტიული ხელოვნებისა და მეცნიერების აკადემიის პრეზიდენტმა, მეგან სკავიომ. „შთამაგონებელია იმის დანახვა, თუ როგორ აგრძელებენ დეველოპერები ინტერაქტიული გართობის ამაღლებას ინოვაციების, თხრობისა და მოთამაშეებისთვის მნიშვნელოვანი გამოცდილების შეთავაზებით.“ წლევანდელ DICE სამიტზე ასევე აღინიშნა ვინს ზამპელას, Call of Duty ფრენჩაიზის თანაავტორის, Infinity Ward-ის და Respawn Entertainment-ის თანადამფუძნებლის, გარდაცვალება, რომელიც 2025 წლის დეკემბერში დაიღუპა. ჰიდეო კოჯიმამ, ფილ სპენსერმა, ტოდ ჰოვარდმა და ინდუსტრიის სხვა წარმომადგენლებმა ისაუბრეს იმაზე, თუ როგორ იმოქმედა მისმა ნამუშევრებმა როგორც ვიდეო თამაშების სამყაროზე, ისე მათზე, როგორც პიროვნებებზე.